भक्तपूर, ४ असार ।
भक्तपुरको सल्लाघारीस्थित यती कार्पेट उद्योगमा भीषण आगलागी भएको छ । आगलागी करिब आठ घण्टापछि निभाइएको छ ।
उद्योगी अनिल केडियाद्वारा सञ्चालित कार्पेट उद्योगमा शनिबार राति करिब साढे ११ बजे उद्योगसँगैको ट्रान्सफर्मर सर्ट भएर आगलागी भएको प्रहरीले जनाएको छ ।
जुद्ध वारुण यन्त्र , नेपाली सेना, काठमाडौं , ललितपुर , नेपाल प्रहरीको गरी ८ दमकलसहित नेपाली सेना, नेपाल प्रहरी र सशस्त्र प्रहरीको सहयोगमा आज बिहान साढे ७ बजे आगो नियन्त्रणमा आएको महानगरीय प्रहरी परिसर भक्तपुरका प्रवक्ता डीएसपी कृष्ण प्रसाईंले बताउनु भयो ।
आगलागीबाट दुई पक्की भवन, पाँचवटा जस्ताको टहरामा सञ्चालित कार्पेट उद्योग पूर्णरुपमा क्षति पुगेको छ ।
आगलागीबाट पोली फाइबर, केमिकल, रङ्ग, २ वटा गाडी, डिजेल स्टोर, डीएफओ तेल स्टोर पूर्णरुपमा नष्ट भएको यति कार्पेट उद्योगका म्यानेजर धमेन्द्र यादवले बताउनु भयो ।
कार्पेट उद्योग पूर्णरुपमा नष्ट भएकाले क्षतिको यकीन विवरण आउन नसके पनि डेढ अर्बभन्दा बढीको क्षति भएको जनाईएको छ । उक्त कार्पेट उद्योगमा एकसय भन्दा बढी कामदार रहेका छन् ।
