केन्द्रीय अध्यक्ष पदम विश्वकर्माले विज्ञप्ती जारी गर्दै लामो इतिहास बोकेको भारतको पश्चिम बंगाल राज्यका नेपाली भाषीहरुमाथि अत्याचार भएको भन्दै विरोध गरेका छन् । ‘नेपाली भाषा, साहित्य र संस्कृति जीवनको अभिन्न अंगको रुपमा रहेको परिप्रेक्ष्यमा हालै पश्चिम बङ्गालमा नेपाली भाषा र नेपाली भाषीमाथि गरिएको अत्यन्तै ज्यादती, अत्याचार र अमानवीय ब्यबहारको अन्तर्राष्ट्रिय नेपाली साहित्य समाज घोर भर्सना गर्दै नेपाली भाषा र नेपाली भाषीको सम्मान गर्न तथा उनीहरुमाथि गरिएको अमानवीय व्यवहार तुरुन्त रोक्न अन्तर्राष्ट्रिय नेपाली साहित्य समाज जोडदार माग गर्दछ,’ विज्ञप्तीमा भनिएको छ ।

अनेसासले पश्चिम बङ्गाल सरकारले नेपाली भाषा र नेपाली भाषीमाथि गरेको दुखद र अत्याचार अन्यायपूर्ण व्यवहार अविलम्ब अन्त्य गरी स्वतन्त्रतापूर्वक स्वेच्छाले भाषाको प्रयोग गर्न पाउने स्वतन्त्र अधिकार सुरक्षित गर्दै सरकारले गरेका दमन तुरुन्त बन्द गर्न आग्रह गरेको छ । ‘पश्चिम बंगाल र त्यस वरपर नेपाली भाषीहरूद्वारा गरिएको सशक्त प्रतिकार र विरोध कार्यको समर्थन गर्दै भारत, नेपाल लगायत विश्वभर रहेका नेपाली साहित्य र नेपाली भाषाकर्मीहरुमा एकबद्द भइ यस्ता निन्दनीय कार्यको घोर बिरोध गर्न पनि हार्दिक अनुरोध गर्दछौं,’ विज्ञप्तीमा लेखिएको छ ।