काठमाडौ ३ असार ।
नेपाल प्रवासी तामाङ समाज कतारले तामाङ समुदायका महत्वपूर्ण व्यक्तित्वहरुलाई सम्मान तथा अभिनन्दन गरेको छ । राजधानीको सुकेधारा स्थित नवदुर्गा पार्टी प्यालेसमा शुक्रबार एक कार्यक्रमकाबीच समाजले नेपाल विद्युत प्राधिकरणका कार्यकारी निर्देशक कुलमान घिसिङ र प्रथम तामाङ महिला सगरमाथा आरोही कान्छीमाया तामाङलाई सम्मान गरेको हो ।
राष्ट्र र जनताको हितमा काम गर्दै तामाङ समुदायको नाम उच्च राख्न सफल भएकोमा उच्च कदर गर्दै कार्यकारी निर्देशक घिसिङ र पहिलो तामाङ महिला सगरमाथा आरोहीका रुपमा सगरमाथा आरोहण गरी इतिहास कायम गर्न सफल तामाङलाई ताम्रापत्रका साथमा दोसल्ला ओडेर अभिनन्दन गरिएको हो । अभिनन्दनपछि कार्यक्रमलाई सम्बोधन गर्दै नेपाल विद्युत प्राधिकरणका कार्यकारी निर्देशक घिसिङले अहिले केही स्थानमा प्राविधिक कारण बाहेक मुलुकभरी नै लोडसेडिङ सुन्य रहेको बताउनु भयो ।
आफूले राज्यबाट दिएको दायित्व पूरा गर्ने क्रममा लोडसेडिङ अन्त्य गर्न सफल भएको भन्दै उहाँले माग व्यवस्थापनमा नेपाली जनताले सहयोग गरेकाले उज्यालो नेपाल अभियान सफल भएको जिकिर गर्नुभयो ।
यसले नेपालमा केही हुदैन भनि निराशा भएको जमात बढेको समय अभियानले आशावादी बढाएको घिसिङ भनाई थियो । वर्तमान चुनौति भनेको लोडसेटिङ अन्त्यलाई निरन्तर दिनु रहेको भन्दै यसमा साथ दिन पनि उहाँले सबैमा अपिल गर्नुभएको छ ।
नेपाल तामाङ घेदुङका अध्यक्ष मोहन गोलेको प्रमुख्य आतिथ्यमा सम्पन्न कार्यक्रममा सांसद दिलमान पाख्रिन, तामसालिङ संयुक्त संघर्ष समितिका अध्यक्ष जय गोले, छार गोङ्मा मासिकका सम्पादक प्रतिक ङेसुर, गायक विश्व दोङ, गजलकार खोजराज गोले लगायतका अतिथिहरुको उपस्थिति रहेको थियो ।
कार्यक्रम समाजका अध्यक्ष तिर्थ तामाङको सभाध्यक्षतामा सम्पन्न भएको थियो । कार्यक्रममा १६ पटकका सगरमाथा आरोही पेम्बा शेर्पालाई पनि अभिनन्दन गरिएको थियो ।
