पोखरा, जेठ १९ ।
प्रधानसेनापति राजेन्द्र क्षेत्रीले देशको सार्वभौमिकता र अखन्डता रक्षाका लागि नेपाली सेना जस्तोसुकै कदम चाल्न तयार रहेको बताउनु भएको छ ।
पोखराको फूलबारी ब्यारेकमा शुक्रबार पश्चिमाञ्चलका भूपू सैनिकहरुलाई सम्बोधन गर्दै प्रधानसेनापति क्षत्रीले सेना विखन्डनकारीहरुको तमासा हेरेर बस्न नसक्ने चेतावनी दिनुभयो ।
उहाँले सेना सधैं संविधानले निर्दिष्ट गरेका मूल्य–मान्यतालाई आत्मसात् गरेर अगाडि बढिरहेको बताउनु भयो ।
मुलुकमा पहिलो चरणको स्थानीय तह निर्वाचन सम्पन्न गराउन सेनाको ठूलो भूमिका रहेको चर्चा गर्दै प्रधानसेनापति क्षत्रीले दोस्रो चरणको निर्वाचनमा पनि सेनाको उत्तिकै महत्व रहने उल्लेख उल्लेख गर्नुभयो ।
कार्यक्रममा अवकाशप्राप्त सैनिकहरुलाई सम्मान गरिनुका साथै सैनिक कल्याणकारी कोषबाट सन्चालित विभिन्न कर्जाहरुसमेत प्रदान गरिएको थियो ।
त्यस्तै, विभिन्न घटनामा घाइते भएका तथा सैनिक परिवारमा आश्रित अपांगता भएका र असहायहरुलाई ह्वील चियरसमेत वितरण गरिएको थियो ।
