सल्यान, २६ वैशाख ।
ऊर्जामन्त्री जनार्दन शर्माले सरकारले भारतबाट खरिद गर्न लागेको एलइडी बल्बमा बाहिर आएजस्तो कुनै चलखेल नभएको बताउनुभएको छ ।
गृह जिल्ला रुकुम जाने क्रममा आज श्रीनगरमा सन्चारकर्मीसँग भएको कुराकानीमा मन्त्री शर्माले नेपाल र भारत सरकारबीच सम्झौता भएपछि बल्ब खरिद गर्ने भएकाले कुनै चलखेल नभएके स्पष्ठ पार्नुभयो ।
उहाँले खलङ्गा शीतलपाटी खानेपानीका लागि विद्युत् जडान प्रक्रिया ढिला भइरहेकाले तत्काल विद्युत् उपलब्ध गराउन नेपाल विद्युत् प्राधिकरण सल्यानलाई निर्देशन पनि दिनुभयो ।
अर्काे प्रसङ्गमा उहाँले सरकारले सबैलाई मिलाएर लानुपर्ने भएकाले दुई चरणमा स्थानीय चुनाव गर्न लागिएको जानकारी दिनुभयो ।
सरकारले सबै राजनीतिक दललाई मिलाएर अगाडि बढ्न चाहेको भन्दै मधेसी मोर्चालाई पनि चुनावमा ल्याउन दुई चरणमा चुनाव गर्न लागिएको मन्त्री शर्माले बताउनु भयो ।
मन्त्री शर्माले स्थानीय तहको निर्वाचन नजिकिँदै गर्दा विभिन्न स्थानमा भइरहेको झडपलाई लक्षित गर्दै दलहरुलाई संयमित हुन समेत आग्रह गर्नुभयो ।
