एजेन्सी, बैशाख १९ ।
मस्कोबाट बैंककतर्फ आउँदै गरेको एउटा विमान खराब मौसमका कारण अचानक अनियन्त्रित हुँदा त्यसमा सवार रहेका २७ यात्री घाइते भएका छन् ।
रूसी अधिकारीहरूकाअनुसार उडानका क्रममा एरोफ्लोट एयरलाइन्सको विमान खराब मौसमका कारण अनियन्त्रित भएको थियो । घाइतेमध्ये केहीको हाडसमेत भाँचिएको बताइएको छ । घाइते तीन यात्रीको शल्यक्रिया गर्नुपरेको अधिकारीको भनाई छ । अन्यलाई भने सामान्य चोटपटक लागेको छ ।
थाइल्याण्डस्थित रूसी दूताबासकाअनुसार घाइतेहरूमध्ये २४ जना रूसी नागरिक रहेका छन् । एयरलाइन्स कम्पनीले जनाएअनुसार सिट बेल्ट नबाँधेका यात्रीहरू उछिट्टिएर घाइते भएका हुन् ।
विमानका पाइलट एलेक्जेण्डर रुजोभकाअनुसार आकाश सफा नै रहेका कारण प्रतिकूल मौसमको पूर्वानुमान नै थिएन । तीन सय १३ यात्री सवार विमान बैंकक विमानस्थलमा अवतरण गर्नुभन्दा करिब ४० मिनेट अघि आकाशमा अनियन्त्रित भएको थियो ।
