काठमाडौं ,वैशाख १ ।
राष्ट्रपति विद्यादेवी भण्डारीले भूकम्पले क्षति र्पुयाएको पर्यटकीय संरचनाहरु पुनर्निर्माणलाई प्राथमिकता दिनुपर्नेमा जोड दिनुभएको छ ।
ओखलढुंगामा आज प्रथम थोलेदेम्बा पर्यटकीय महोत्सव उद्घाटन गर्दै उहाँले पर्यटन प्रवर्द्धनका लागि पुनर्निर्माण पहिलो प्राथमिकता भएको बताउनुभयो ।
उर्जाशील युवाको जोश जाँगर, उर्जा, भाषा, सीप, आतिथ्यता, कुशलता समेत समेटेर पर्यटन मैत्री तालिम दिई अवसर सिर्जना गर्नु आजको आवश्यकता रहेको राष्ट्रपति भण्डारीको भनाई छ ।
जिल्लाको समग्र विकासका लागि सांस्कृतिक र पुरातात्विक स्थलको जगेर्ना गर्दा पर्यटनमा ठोस मद्दत पुग्ने भएकोले सबैले ध्यान दिनुपर्नेमा राष्ट्रपति भण्डारीले जोड दिनुभयो ।
बढ्दो सहरी करण औद्योगिकरण र प्रदूषणले गर्दा पर्यटकीय पदमार्ग प्रमुख आकर्षण बन्न थालेको बताउँदै भण्डारीले कृषि, पर्यटन र उर्जाको प्रचूर सम्भावना बोकेको नेपालमा पर्यटकीय पदमार्गहरुको विकास गर्नुपर्ने बताउनुभयो ।
सोही कार्यक्रममा एमाले महासचिव ईश्वर पोख्रेलले रामेछापदेखि खोटाङ जोड्ने राजमार्ग बन्ने निश्चित भएकाले ओखलढुंगा जिल्ला अब पूर्वको समृद्धि र विकासको पर्यायको जिल्ला हुने बिश्वास ब्यक्त गर्नुभयो ।
यस्तै कांग्रेस नेतृ सुजता कोइरालाले सबै दलहरु एक नभई कुनै विकास निर्माणका काम सफल नहुने धारणा राख्नुभयो ।
पर्यटकीय पदमार्ग तथा गन्तव्यको रुपमा विकास गर्न जिल्लाकै सबैभन्दा अग्लो भनिएको देम्बामा महोत्सव आयोजना गरिएको आयोजक समितिका संयोजक देण्डी शेर्पाले बताउनुभयो ।
