काठमाडौं, चैत्र २९ ।
नेपालको आन्तरिक एवं बाह्य पर्यटकलाई लक्षित गर्दै ट्राभल्स नेपाल बस सर्भिस (प्रा.)लि.ले नयाँ सुविधा सम्पन्न बस सञ्चालनमा ल्याएको छ ।
सञ्चालनमा ल्याइएको उक्त नयाँ बसमा चर्पी, रेष्टुराँ,सहितको सुविधा सम्पन्न, आरामदायी र एयर कण्डिसनसमेतको व्यवस्था गरेको छ ।
यात्रुहरूको चाहना, सुरक्षा र सुविधालाई मध्यनजर गर्दै काठमाडौंदेखि लुम्बिनी र काठमाडौंदेखि पोखरासम्मका लागि हाल चार वटा बस सञ्चालनमा ल्याइएको प्रालिका सञ्चालक दिपक भट्टराईले जानकारी दिँदै यात्रुहरूको चाहनालाई हेरेर अब चाँडै नै थप पाँच वटा बस पनि सञ्चालन गर्ने जानकारी दिए ।
सो सेवाको सोमबार उद्घाटन गर्दै संस्कृति, पर्यटन तथा नागरिक उड्डयन राज्यमन्त्री पर्शुराम तामाङले यस्तो बस सञ्चालनले नेपालको पर्यटन विकासमा थप टेवा पुग्ने बताउँदै उनले भने, ‘उक्त बस लुम्बिनी र पोखरामा मात्र नभई अरू पर्यटकीय गन्तव्यमा समेत पुर्याउनु आवश्यक छ ।’
नेपाल पर्यटन बोर्ड सञ्चालक समितिका सदस्य राजेन्द्रप्रसाद सापकोटाले समयको मागअनुसार सेवा प्रदान गरेको भन्दै यसको विकास र विस्तारमा लाग्नु जरुरी रहेको बताए ।
प्रालिका अध्यक्ष श्रीकान्त आचार्यले नयाँ बसबाट यात्रा गर्न चाहनेहरूका लागि मोबाइल एप्स र ई–सेवामार्फत टिकट काट्ने व्यवस्था मिलाइएको जानकारी दिए । उनकाअनुसार भोलि बुधबारदेखि लुम्बिनी र पोखरामा एकसाथ बस सञ्चालन गरिने भएको छ ।
उनले बसभित्र तातो, चिसो खानेकुरा सुविधासँग खान र पिउनका लागि फोल्डेवल सेवन जडित गरिएको र धुम्रपानको बानी भएका यात्रुको लागि छुट्टै ठाउँको व्यवस्थासमेत रहेको बताए ।
२७ जनाको सिट क्षमता रहेको उक्त बस चढ्नेले काठमाडौं–पोखराका लागि १७ अमेरिकन डलर र काठमाडौं–लुम्बिनीका लागि २५ अमेरिकन डलर भाडा तिर्नुपर्ने हुन्छ ।
