ललितपुर, १२ माघ । अर्थमन्त्री कृष्णबहादुर महराले आर्थिक विकासबाट नै देशको मेरुदण्ड मजबुत हुने बताउनु भएको छ ।
नेपाल उद्योग वाणिज्य महासङ्घद्वारा ६५ औँ अन्तर्राष्ट्रिय भन्सार दिवसका अवसरमा आज आयोजित अन्तरक्रियामा उहाँले भन्सार, उद्योग व्यवसायी बीचको सम्बन्धलाई प्रगाढ बनाउनुपर्नेमा जोड दिनुभयो । उपप्रधानमन्त्री महराले आर्थिक ऐनसम्बन्धी नीतिगत विषय परिवर्तन बजेटमार्फत गरिने प्रावधान रहेको बताउनुभयो ।
आर्थिक क्षेत्रको गतिशिलताले राज्यको विकासको कार्यक्रम द्रुत गतिले अगाडि बढ्न सक्ने उहाँको धारणा थियो । उपप्रधानमन्त्री महराले राज्यले लगाउँदै आएको कर तथा भन्सारसम्बन्धी ऐन, विनियम समयानुकूल समायोजन हुँदै जानुपर्ने बताउनुभयो ।
भन्सार विभागका महानिर्देशक शिशिरकुमार ढुङ्गानाले विश्वासिलो व्यवसायीलाई भन्सार सुविधा दिनुपर्नेमा जोड दिनुभयो । उहाँले चालु आवभित्र रु २४६ अर्ब भन्सार क्षेत्रबाट राजस्व उठाउने लक्ष्य रहेको बताउनुभयो ।
महासङ्घका अध्यक्ष पशुपति मुरारकाले वस्तुमा लगाइने मूल्याङ्कन नै ठूलो समस्या भएको बताउनु भयो ।
