काठमाडौँ, १० माघ । ऊर्जामन्त्री जनार्दन शर्माले बिजुली चोरी गर्ने , भ्रष्टाचार गर्ने र ठगी गरी मुलुकलाई अन्धकारमा राख्नेको बोसो झिक्ने चेतावनी दिनु भएको छ ।
पानी, प्रकृति एवम् कृषिको क्षेत्रमा काम गर्दै आएको ‘अष्ट ज’ अभियानले आज आयोजना गरेको ‘नेपालको पानी जनताको लगानी तर कसरी’ विषयक अन्तरक्रिया कार्यक्रममा यस्तो बताउनु भएको हो ।
मन्त्री शर्माले हाल विद्युत् प्राधिकरणमा रहेका वा नरहेका बिजुली चोर एक÷एक गरी समातिने र तिनलाई कठोर कार्बाही गर्ने चेतावनी दिनु भयो ।
बिजुलीको मिटर बटारेर कमिसन असुल्ने प्राधिकरण भित्रका भ्रष्टलाई तह लगाएर मात्र चुहावट नियन्त्रणको अभियान सफल पारिने मन्त्री शर्माले बताउनु भयो ।
एक प्रसगंमा उहाले नेपालमा विज्ञ र ईन्जिनियरको समेत क्षमतामा प्रश्न गर्दै विद्युत आयोजनाको संभाव्यता अध्ययन गर्न बर्षौ लगाउने गरेकाले आयोजना ढिलो हुने गरेको पनि बताउनु भयो ।
