पाल्पा , २७ पुस ।
उद्योगमन्त्री नवीन्द्रराज जोशीले नेपाली उद्योगमा विदेशी लगानी भित्र्याउन नयाँ औद्योगिक कानुन ल्याउन तयारी भईरहेको बताउनु भएको छ ।
प्रथम रामपुर महोत्सव तथा व्यापार मेलाको उद्घाटन गर्दै मन्त्री जोशीले औद्योगिक कानुनमा समस्या भएकाले बिदेशी लगानि भित्राउन कठिन भएकाले केहीदिनभित्रै संसद्बाट संशोधन गरी पारित गर्ने तयारी भइरहेको बताउनु भयो ।
उहाले आर्थिक समृद्धिबिना मुलुकको विकास नहुने हँुदा उद्योग क्षेत्रको विकासका लागि सरकार र निजी क्षेत्रबीच सहकार्य हुनुपर्ने बताउनुभयो ।
मुलुकलाई अब आर्थिक समृद्धितर्फ लैजानुको विकल्प नभएको मन्त्री जोशीको भनाई छ । मुलुकमा विगतमा सञ्चालन भएर बन्द भएका हेटौँडा कपडा उद्योग र नेपाल औषधि उद्योगलाई पुनःसञ्चालन गर्न वर्तमान सरकार लागिरहेको मन्त्री जोशीले बताउनुभयो ।
मन्त्री जोशीले रामपुरमा औद्योगिक क्षेत्र निर्माणका लागि संभाव्यता अध्ययन गर्ने प्रतिबद्धतासमेत जनाउनुभयो ।
आगामी माघ ८ गतेसम्म सञ्चालन हुने उक्त महोत्सवमा रु १० करोड बराबरको कारोबार हुने र करिब दुई लाख दर्शकले अवलोकन गर्ने आयोजक समितिका अध्यक्ष भोजेन्द्र प्रकाश ढकालले जानकारी दिनुभयो ।
