चितवन, २५ पुस ।
एघारौँ चितवन महोत्सव आजबाट सुरु भएको छ । यही माघ ५ गतेसम्म नारायणी नदी किनारमा सञ्चालन हुने महोत्सवको प्रधानमन्त्री पुष्पकमल दाहालले उद्घाटन गर्नुभयो ।
महोत्सव सुरु हुनुअघि विभिन्न बाजागाजा र झाँकी सहितको शोभायात्रा निकालिएको थियो ।
महोत्सवमा पाँच सयवटा साधारण स्टल, सात विशेष स्टलसहित जनजातिका रहनसहन झल्कने बोटे, कुमाल, चेपाङ र थारू जातिका घर पनि रहेका छन् ।
स्टलमा स्वदेशी र विदेशी उत्पादन बिक्री तथा प्रदर्शनका लागि राखिएको महोत्सव मूल आयोजक समितिका संयोजक राजन गौतमले बताउनु भयो ।
दैनिक राष्ट्रिय र स्थानीय कलाकारले मनोरञ्जन दिने महोत्सवमा पाँचवटा विभिन्न विषयको कार्यशाला गोष्ठी आयोजना गरिने जनाईएको छ ।
महोत्सवका क्रममा यही पुस २८ देखि माघ २ गतेसम्म चार दिन नारायणगढको क्याम्पाचौरमा फुड फेस्टिवल पनि हँुदैछ । महोत्सव तीन लाखभन्दा बढीले अवलोकन गर्ने र रु २५ करोड रुपैयाँभन्दा माथिको कारोबार हुने अपेक्षा गरिएको छ ।
