सिन्धुली, २३ पुष । सिन्धुलीको सिन्धुली बहुमुखी क्याम्पसमा विद्यार्थी संगठनहरुले क्याम्पस प्रशासनमा तालाबन्दी गरेका छन् । शुल्क बृद्धिको विरोधमा क्याम्पसमा रहेका तीन विद्यार्थी संगठनहरुले क्याम्पस
प्रशासनमा ताला लगाई दिएका हुन् ।
क्याम्पस व्यवस्थापनले विद्यार्थीलाई समस्या हुने गरी अवैज्ञानी,
अव्यवहारिक र मनोमानी तवरले शुल्क बृद्धि गरेको भन्दै विद्यार्थी संगठनहरुले तालाबन्दि गरेको अखिल क्रान्त्रिकारी सिन्धुलीका अध्यक्ष उत्तम पहाडीले जानकारी दिनु भयो ।
क्याम्पसले आफुखुसी शुल्क बृद्धि गरेपछि नेपाल विद्यार्थी संघ, अनेरास्ववियु र अखिल क्रान्तीकारी क्याम्पस इकाई समितिले क्याम्पसको प्रशासनमा तालाबन्दी गरेको उहाँको भनाई छ ।
विद्यार्थी संगठनका अनुसार क्याम्पस व्यवस्थापन समितिले २०७३ पुष ७ गतेबाट लागु हुनेगरी कक्षा ११ मा बार्षिक ८ हजार ८ सय शुल्क रहेकोमा बृद्धि गरेर १३ हजार ५ सय ५०, स्नताक तह पहिलो बर्षमा ११ हजार ७ सय ५० रहेकोमा बृद्धि गरेर १६ हजार ४ सय ५० स्नाकोत्तर तहको पहिलो बर्षमा १४ हजार ६ सय ५० रहेकोमा बृद्धि गरि २२ हजार ६ सय कायम गरिएको छ ।
हरेक तहमा सोही अनुपातमा शुल्क बृद्धि गरिएको विद्यार्थी संगठनहरुले बताएका छन् ।
शुल्क बृद्धि गरेको विरोधमा कालोपट्टी बाधेर विरोध गर्दै हस्ताक्षर संकलन गरी प्रशासन समक्ष बुझाएको भए पनि क्याम्पस प्रशासनले बेवास्ता गरेको विद्यार्थी संगठनहरुको भनाई छ ।
यता क्याम्पस प्रमुख दुर्गा प्रसाद अधिकारीले शुल्क बृद्धिप्रति विद्यार्थी संगठनले जनाएको असन्तुष्टि क्याम्पस व्यवस्थापनलाई जानकारी गराईएको बताउनु भएको छ । २०६४ सालमा बृद्धि गरिएको शुल्कलाई क्याम्पस सञ्चालन गर्न केही थप गरेर समायोजन गरिएको उहाँको भनाई छ ।
