भक्तपुर , कार्तिक १२ ।
मोटरसाइकल ठक्करबाट मृत्यु भएकी महिलाका आफन्तले क्षतिपूर्तिको माग गर्दै आज महानगरीय प्रहरी वृत्त थिमिमा तोडफोड गरेका छन् ।
दोलखा– ८ जिरीकी ४५ वष्र्षिय सरस्वती खड्काको मृत्यु भएपछि उनका आफन्तले आज क्षतिपूर्तिको माग गर्दै प्रहरी वृत्त थिमिको घेराउ गरेका छन् ।
तीव्रगतिमा आएका बा ८० प ५००८ नम्बरको मोटरसाइकलले हिजो मध्यपुरथिमिमा ठक्कर दिँदा सरस्वतीको मृत्यु भएको थियो ।
उनीहरुले मृतकका दुई छोराछोरीको पढाइ, पालनपोषणको जिम्मेवारी र उचित क्षतिपूर्ति दिनुपर्ने माग गरेका छन् । प्रहरी वृत्त घेराउ गर्नेहरुले ढुङ्गा प्रहार गर्दा वृतमा कार्यरत प्रहरी कृष्णबहादुर तामाङ र जयन्तराज कार्की घाइते भएका छन् ।
घाइते दुबै जनाको मध्यपुर अस्पतालमा उपचार भइरहेका छन् ।
ढुङ्गा प्रहारबाट महानगरीय प्रहरी वृत्त थिमिका प्रहरी नायव उपरीक्षक श्यामबाबु ओलीयाको गाडीको अगाडीको सिसा फुटेको छ भने प्रहरी वृत्त थिमिको भवनको सिसा फुटेको छ । तोडफोडबाट करिब रु. एक लाख ५० हजारको क्षति भएको अनुमान प्रहरीको छ ।
तोडफोडमा संलग्न रहेका पाँच जनालाई प्रहरीले नियन्त्रणमा लिएको छ ।
