काठमाण्डौ ,११ कार्तिक ।
सरकारले दुई छिमेकी मुलुक भारत र चीनका राष्ट्रप्रमुख नेपाल आउँदा सार्वजनिक बिदा दिने निर्णय गरेको छ ।
आज बसेको मन्त्रिपरिषद् बैठकले अबदेखि भारत र चीनका राष्ट्रप्रमुख आउने दिन सरकारी बिदा दिने निर्णय गरेकोसञ्चारमन्त्री सुरेन्द्रकुमार कार्कीले जानकारी दिनुभयो ।
सरकारको निर्णयसँगै आगामी बुधवार भारतीय राष्ट्रपति प्रणब मुखर्जी नेपाल आउने दिन सार्वजनिक बिदा हुनेछ ।
बैठकले मुखर्जी नेपाल आउने दिन कार्तिक १७ गते बुधवार उहाको स्वागतमा सार्वजनिक बिदा दिने निर्णय गरेको सञ्चारमन्त्री कार्कीले जानकारी दिनुभयो ।
मुखर्जी यहि १७ गते बुधवार तीन दिने नेपाल भ्रमणका लागी काठमाण्डौ आउदै हुनुहुन्छ । सरकारले छिमेकी मुलुकका राष्ट्रप्रमुख आउदा एक दिन बिदा दिने निर्णय गरेको हो ।
यस्तै बैठकले घरेलु तथा साना उद्योग विकास सञ्चालक समितिमा उर्गेन्द्र आचार्यलाई नियुक्त गर्ने निर्णय गरेको सरकारका प्रवक्ता समेत रहेका कार्कीले बताउनु भयो ।
बैठकले सशस्त्र प्रहरीको अहिलेको पिटि ड्रेस परिवर्तन गरी सेतो बनाउने पनि निर्णय गरेको छ । मन्त्रीपरिषदबाट थानकोट–चित्लाङ गणेशमान मार्गको स्तरोन्नति गर्ने निर्णय पनि भएको कार्कीले जानकारी दिनुभयो ।
