काठमाडौं, कात्तिक ११।
डेंगुको प्रकोप फैलिँदै गए पनि परीक्षण गर्ने किटको अभावले उपचार प्रभावित भएको छ । तत्कालका लागि किट खरिद गरी हिजो नै ल्याउने बताइए पनि किट आइपुग्न सकेको छैन् ।
इपिडिमियोलोजी तथा रोग नियन्त्रण महाशाखाले आज एक हजार थान किट आउने दाबी गरेको छ । तर यो सबै ठाउँका लागि पर्याप्त भने हुने छैन ।
किट अभावका कारण डेंगु रोग लागेको आशंका गरिएका व्यक्तिको रगत परीक्षण समेत हुन सकेको छैन । तराइका सबैजसो जिल्लामा डेंगुको संक्रमण भएको हुन सक्ने आशंका गरिएपनि परीक्षण भएको छैन ।
डेंगु रोग चितवन, झापा, पर्सा, काठमाण्डू, ललितपुर, रुपन्देही, कैलाली, धादिङ, काभ्रे, कास्की, स्याङ्जा, बागलुङ, बारा, सप्तरीलगायत १६ जिल्लामा देखिसकेको छ ।
यस्तै पहाडी जिल्लामा पनि डेंगुको संक्रमणको खतरा रहेको डा. शेरबहादुर पुनले बताउनुभयो । लामखुट्टे सक्रिय भइरहेकाले पहाडी क्षेत्रमा पनि डेंगुको खतरा उच्च रहेको उहाँले बताउनुभयो ।
एडिस एजिप्टाई नामक लामखुट्टेको टोकाइका कारण डेंगु रोग लाग्ने गर्दछ । घर आँगनमा जमेको पानी हटाउन र लामखुट्टेको टोकाइबाट बँच्न डाक्टरले सुझाव दिएका छन् ।
