काठमाडौं ,५ कार्तिक ।
अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीलाइ महाअभियोग लगाउने दलहरुको तयारीलाई नयाँ शक्ति नेपालले समर्थन गरेको छ ।
नयाँ शक्तिले आज (शुक्रवार) विज्ञप्ति जारी गर्दै लोकमानलाई महाअभियोग लगाउने दलहरुको प्रस्तावमा समर्थन जनाएको हो ।
संबैधानिक अंगमा वहाल रहेका कुनै पनि अधिकारीले आफ्नो पदीय आचरण बिरुद्ध काम गरे महाअभियोग लगाउन सार्वभौम संसद सक्षम रहेको समेत विज्ञप्तीमा उल्लेख छ ।
प्रबक्ता खिमलाल देवकोटाद्धारा जारी विज्ञप्तिमा पछिल्ला पटकका संसदबाट सिधै नियुक्त हुने जनलोकपालले मात्र विना हस्तक्षेप काम गर्न सक्ने भन्दै आगामी दिनमा संबैधानिक निकायमा पदाधिकारी नियुक्त गर्दा हाम्रा भन्दा राम्रा मान्छे खोज्न ध्यानाकर्षण गराइएको छ ।
संसदीय समितिले बोलाउँदा नजाने, न्यायपालिकाको काममा अवरोध गर्ने जस्ता गतिविधिले सु–शासन कायम राख्न गठन भएको शक्तिशाली संबैधानिक अयोगमा रहेका व्यक्ति गलत थिए भन्ने स्पष्ट हुने नयाँ शक्तिले जनाएको छ ।
पछिल्ला घटनाले आयोगको प्रमुख नियुक्ति मै त्रुटी रहेको पुष्टि हुने भन्दै उसले संसदप्रति उत्तरदायी हुने जनलोकपाल गठन गर्नुपर्नेमा जोड दिएको छ ।
नयाँ शक्तिले पछिल्लो प्रकरणको आडमा कुनै पनि दल वा व्यक्तिले आफ्ना भ्रष्टाचारजन्य कार्य र नियत ढाकछोप गर्न नपाउन भन्नेतर्फ पनि सतर्क रहन आग्रह गरेको छ ।
