काठमाडौं, १७ असोज । कलर्स एक्स फ्याक्टरलाई पराजित गर्दै पञ्चकन्या तेजले एभरेष्ट प्रिमियर लिगको उपाधीको जितेको छ । आज किर्तिपुरमा भएको फाइनल खेलमा कलर्सलाई ४० रनले पराजित गर्दै पञ्चकन्या च्याम्पियन बनेको हो ।
पञ्चकन्या तेजले दिएको १७२ रनको लक्ष्य पछ्याएको कलर्स १७.३ ओभरमा १३१ रन जोड्दा अलआउट भयो । पञ्चकन्यालाई च्याम्पियन बनाउने क्रममा प्रतिभाशाली युवा ब्याट्सम्यान आशिफ शेख नायक सावित भए । म्यान अफ दि म्याच घोषित शेखले ६८ बलमा ८ छक्का र ७ चौकाको मद्दतले अविजित १ सय ११ रन जोडे ।
आशिफको यही सानदार पारीको बलमा पञ्चकन्याले कलर्ससामु १ सय ७२ रनको विशाल चुनौती पेश गरेको थियो । तर, लक्ष्य पछ्याउने क्रममा १७ ओभर ३ बलमा १ सय ३१ रन जोड्दा कलर्स अलआउट भयो । उसका लागि कप्तान ज्ञानेन्द्र मल्लले ४७ र राजेश पुलामी मगरले ३७ रनको योगदान गरेपनि त्यो जितका लागि पर्याप्त भएन ।
बलिङमा पनि निकै सानदार प्रदर्शन गरेको पञ्चकन्याका लागि करन केसीले ३, कप्तान सरद भेसवाकर र सुशील कंडेलले समान २ तथा दिपेन्द्र ऐरीले १ विकेट लिए ।
उपाधि यात्रा तय गर्नेक्रममा पञ्चकन्या सिंगो प्रतियोगिताभर अपराजित रह्यो ।
