२३ भदौ, काठमाडौं ।
एएफसी सोलिडारिटी कप फुटबल प्रतियोगिताको लोगो तथा खेलतालिका सार्वजनिक गरिएको छ ।
एशियाली फुटबल महासंघ एएफसीको आयोजनामा हुन लागेको प्रतियोगिता मलेसियामा आागामी नोभेम्बर २ देखि १५ तारिखसम्म हुनेछ ।
प्रतियोगितामा ८ वा ९ टोलीको सहभागिता रहने एएफसीले जनाएको छ । सहभागी टोलीलाई दुई समूहमा बिभाजन गरिएको छ ।
२०१८ को विश्वकप र २०१९ को एसियन कप छनौटबाट बाहिरिइसकेका ६ टोलीलाई फिफा बरियताको आधारमा क्रमैसँग राखिएको छ ।
जसमा नेपाल, श्रीलंका, पाकिस्तान, मकाउ, ब्रुनाई र मंगोलियालाई समावेश गरिएको छ । अन्य दुई वा तीन टोलीको टुंगो भने आगामी अक्टोवर ११ मा हुने एसियन कप छनौट प्लेअफ सकिएपछि लाग्नेछ ।
प्रतियोगिताको समूह ए मा नेपालसहित पाकिस्तान र ब्रुनाइ छन् । साथै इस्ट टिमोर र ताइवान तथा भुटान र बंगलादेशबीच एक टोली समूह एमा रहनेछन् ।
आगामी अक्टोवर १० मा हुने एसियन कप छनौट प्ले अफमा भुटान बंगलादेशसँग पराजित भएमा प्रतियोगितामा ८ टोलीमात्र समावेश गराइनेछ भने नेपाल रहेको समूह एमा चार टोलीमात्र रहनेछन् । एएफसीका अनुसार भुटानले प्रतियोगिता खेल्न इच्छा देखाएको छैन ।
समूह बीमा श्रीलंका, मकाउ र मंगोलिया छन् । यस समूहको अर्को टोली माल्दिभ्स र लाओसमध्ये एक हुनेछ । दुई समूहको बिजेता र उपबिजेताले सेमिफाइनलमा स्थान बनाउनेछन् ।
लामो समयसम्म अन्तर्रा्ष्ट्रिय प्रतियोगिता खेल्न नपाउने फिफा बरियातामा पछिल्ला क्रममा रहेका एशियाली मुलुकका टोलीहरुलाई समेटेर एएफसीले नयाँ प्रतियोगिताको अवधारणा ल्याएको हो । एएफसी च्यालेन्ज कप आयोजना हुन छोडेपछि यसलाई त्यसैको विकल्पको रुपमा समेत हेरिएको छ ।
