काठमाडौं, साउन २४।
प्रधानमन्त्री पुष्पकमल दाहाल प्रचण्डले साउदी अरब, श्रीलंका लगायत देशमा अलपत्र परेका नेपालीहरुलाई तत्काल स्वदेश फर्काउन परराष्ट्र मन्त्रालयलाई निर्देशन दिनु भएको छ ।
परराष्ट्र मन्त्रालयका सचिव शंकरदास बैरागीलाई आज टेलिफोन गरी प्रधानमन्त्रीले रोजगारीका लागी पुगेर खाडि मुलुकमा अलपत्र परेका नेपालीहरूलाई तुरुन्तै नेपाल आउने वातावरण निर्माण गर्न निर्देशन दिनु भएको हो ।
उहाँले सम्बन्धित देशको सरकार र दूतावाससँग समन्वय गरी यथाशिघ्र उनीहरुलाई राहतको व्यवस्था मिलाउन पनि निर्देशन दिनु भएको छ ।
जवाफमा परराष्ट्र सचिव वैरागीले प्रधानमन्त्रीको निर्देशन तुरुन्तै कार्यान्यवन गर्ने बताउनु भएको थियो ।
प्रधानमन्त्रीले सम्बन्धित देशको सरकार र दूतावाससँग समन्वय गरी यथाशीघ्र उनीहरुलाई त्यही रोजगारीको व्यवस्था गर्न र त्यसो नभए सरकारी खर्चमै नेपाल ल्याउन पनि निर्देशन दिनुभएको वैरागीले बताउनु भयो ।
सचिव बैरागीले प्रधानमन्त्रीको निर्देशनलगत्तै सम्बन्धित मुलुकमा रहेको नेपाली दूतावास र सम्बद्ध अधिकारीलाई समस्या समाधान गर्ने प्रतिबद्धता जनाएको प्रधानमन्त्रीको कार्यालयले जारी गरेको प्रेस नोटमा उल्लेख छ ।
