काठमाडौ २१ साउन ।
विश्व खेलकुदको महाकुम्भ गृष्मकालिन ओलम्पिकको ३१ औं संस्करण आजबाट ब्राजिलको राजधानी रियो दि जेनेरियामा औपचारिक रुपमा सुरु हुदैछ ।
फुटबल तर्फका खेलहरु गत बुधबार बाटै सुरु भएपनि प्रतियोगिताको औपचारिक उद्घाटन भने आज साँझ मात्र हुन लागेको हो । समारोहका लागि रियोस्थित माराकाना रंगशालाई भव्य रुपमा सजाइएको छ ।
माराकाना स्टेडियममा एक विषेश समारोहकाबीच महान फुटबलर पेलेले ओलम्पिक फेम प्रज्वलन गरेपछि प्रतियोगिताको औपचारिक सुरुवात हुनेछ ।
नयाँ संसार नारा दिइएको उद्घाटन समारोहमा नेपालको राष्ट्रिय झन्डा १२ औं सागका स्वर्ण पदक विजेता फुपुल्हामु खत्रीले बोक्नेछिन् ।
प्रतियोगितामा एथ्लेटिक्स र पौडीमा दुई दुई तथा जुडो, तेक्वान्दो र आर्चरीमा एक एक जना गरी नेपालका तर्फबाट सात खेलाडीले प्रतिस्पर्धा गर्नेछ ।
एथ्लेटिक्समा हरि रिमाल र सरस्वती भट्टाराई, पौडीमा शिरीष गुरुङ र गौरिका सिंह, तथा जुडोमा फुपुल्हामु खत्री, तेक्वन्दोमा निशा रावल र आर्चरीमा जितबहादुर मोक्तनले नेपालको प्रतिनिधित्व गर्नेछ ।
रियो ओलम्पिकको उद्घाटन समारोहमा सहभागी हुन विभिन्न देशका राष्ट्र प्रमुख तथा सरकार प्रमुख साथै विषेश पाहुना ब्राजिल पुग्ने क्रम जारी छ ।
१७ दिनसम्म चल्ने प्रतियोगितामा नेपालसहित विश्वका दुई सय ६ देशको सहभागीता रहनेछ । प्रतियोगिताका विभिन्न २८ खेलमा ११ हजार दुई सय ३९ जनाले प्रतिस्पर्धा गर्नेछन् ।
