धनकुटा, १४ साउन ।
धनकुटाको परेवादिन गाविस वडा नम्बर–५ सिधुवामा यात्रुबहाक बस दुर्घटना हुँदा मृत्यु हुनेको सङख्या १५ पुगेको छ ।
दुर्घटनामा नेकपा माओवादी केन्द्रका केन्द्रीय सदस्य तथा पूर्वअर्थ राज्यमन्त्री हरिराज खेवासहित १५ जनाको मृत्यु भएको छ ।
सात जनाको घटना स्थलमै र आठ जनाको उपचारका क्रममा मृत्यु भएकोे हो । अझै २५ बढी घाइतेहरुको उपचार भइरहेको प्रहरीले जनाएको छ ।
संखुवासभाको मुढशनिश्चरेबाट धरानका लागि छुटेको बा २ ख ७३६६ नम्बरको बस हिजो दुर्घटना भएको थियो ।
दुर्घटनामा परि धनकुटाको परेवादिन–६ की तारा बस्नेत र उनकी ३ वर्षे छोरी रेश्मा, परेवादिन–७ धनकुटाकी अतिमाया तामाङको मृत्यु भएको छ ।
यस्तै सोही गाविसका खिनमाया भट्राई, धनकुटा लेगुवाका तेजबहादुर थापा, धरान–२ का बेदप्रकाश अग्रवाल, तेह्रथुम फुलेककी हेमा पौडेल, धनकुटा मारेकटहरेका बिरबहादुर काफ्ले, संखुवासभा मादीका टंक कटुवाल, धरानका चेतन मगर र बस चालक काभ्रेका सनम तामाङ रहेका छन् । अन्य ३ जनाको भने अझै परिचय खुलेको छैन ।
दुर्घटनामा परि घाइते भएकामध्ये २९ जनाको अहिले विपी कोइराला स्वास्थ्य विज्ञान प्रतिष्ठानमा उपचार भइरहेको प्रहरीले जनाएको छ ।
