काठमाडौं,१२ साउन ।
केहिदिनदेखि परिरहेको बर्षा आजबाट केहि कम हुने भएको छ ।
तर मनसुन सक्रिय बनाउने न्यूनचापीय क्षेत्र नेपाल नजिक भएका कारण अझै दुई दिन सम्म देशैभर बर्षा हुने जलवायु तथा मौसम पूर्वानुमान महाशाखाको अनुमान छ ।
नेपालमा वर्षा गराउन बंगालको खाडी र अरब सागर दुबैतिरबाट जलवाष्पयुक्त हावा नेपालतर्फ आइरहेको देशैभरी भइरहेको वर्षा अझै केही दिन जारी रहने मौसमविद् शान्ति कँडेलले जानकारी दिनुभयो ।
तर आजबाट भारी वर्षा भने क्रमशः घट्दै जाने उहाले बताउनु भयो । मनसुनको न्यून चापीय रेखा उत्तरतिर सरेका कारण नेपालमा बढी पानी परेको भएपनि अब कम हुने उहाको भनाई छ ।
बंगाल र अरब सागरबाट आएको जलवाष्पयुक्त हावा उत्तरी हिमालमा ठोक्किएर नेपालतर्फ फर्किदा बढी वर्षा भएको महाशाखाले जनाएको छ । दक्षिण एसियाली मनसुनलाई मूख्य रुपमा प्रभाव पार्ने एलनिनोको अवस्था कमजोर हुँदै गएको र लानिनोको अवस्था बलियो भएकाले मनसुनको अन्त्यतिर झन् बढी वर्षा हुने मौसमविद्को निष्कर्ष छ ।
