काठमाडौ ११ साउन ।
राजधानीमा जारी राष्ट्रिय महिला क्रिकेट छनोट प्रतियोगिताको फाइनलमा आज विभागिय टोली सशस्त्र प्रहरीको एपिएफ र पूर्वान्चलबीच प्रतिस्पर्धा हुदैछ ।
खेल बिहान ९ बजेपछि किर्तिपूरस्थित टीयु क्रिकेट मैदानमा हुनेछ । प्रतियोगिताको पहिलो सेमिफाइनलमा मध्यपश्चिमान्चललाई ९ विकेटले पराजित गर्दै एपिएफ फाइनलमा पुगेको हो ।
यस्तै हिजो भएको दोस्रो सेमिफाइनल सुदुरपश्चिमान्चलमा नेट रनरेटका आधारमा पराजित गर्दै पूर्वान्चलले एपिएफसँग उपाधि भिडान्त तय गरेको हो ।
सुदुरपश्चिमसँग ८ ओभरको खेल चरिरहँदा वर्षाका कारण खेल प्रभावित भएपछि पूर्वान्चल नेटरनरेटका आधारमा फाइनलमा पुगेको हो ।
आजको फाइनल विजेता र अन्य टोलीको उत्कृष्ट खेलाडीलाई छनोट गरी अक्टोबर ९ तारीखमा हङकङमा हुने महिला विश्वकपको एसियाली छनोटका खेलका लागि २४ जनाको राष्ट्रिय महिला क्रिकेट टोली तयार गरिनेछ ।
प्रतियोगितामा नेपालले आयोजक हङकङ, चीन र थाइल्याण्डसँग प्रतिस्पर्धा गर्नेछ । राउन्ड रोबिन लिगका आधारमा हुने प्रतियोगिताको शिर्ष टोलीले ग्लोबल छनोट खेल खेल्ने अवसर समेत पाउनेछ ।
