काठमाडौं ,७ असार ।
वीर अस्पताललाई भवन निर्माणका लागी सरकारले भक्तपुरको दुवाकोटमा ७ सय रोपनी जग्गा उपलव्ध गराउने भएको छ ।
मन्त्रीपरिषद्को आजको बैठकले वीर अस्पतालको आधुनिक भवन नयाँ स्थानमा बनाउन जग्गा दिने निर्णय गरेको सञ्चारमन्त्री शेरधन राईले जानकारी दिनुभयो ।
त्यस्तै, मुस्ताङको लोमाथाङ्कामा रहेको युरेनियम खानीको सुरक्षा जिम्मा नेपाली सेनालाई दिने निर्णय भएको पनि उहाले बताउनु भयो । मन्त्रीपरिषद्ले राष्ट्रिय अनुसन्धान नीति कार्यान्वयन गर्ने निर्णय समेत गरेको छ ।
यस्तै सरकारले आम सञ्चार नीति पारित गरेसँगै नेपालमा प्रसारण हुने विदेशी टेलिभिजनले अब बिज्ञापन रहित सामाग्रि मात्र प्रसारण गर्नुपर्ने भएको छ ।
स्वदेशी विज्ञापन तथा टेलिभिजनलाई प्रोत्साहन गर्नका लागी विदेशी च्यानल र विज्ञापनलाई क्लिन फिडको नियम लगाउने निर्णय भएको मन्त्री राईले जानकारी दिनु भयो ।
नीति लागू भएमा नेपालमा प्रसारण हुने विदेशी टेलिभिजनले अब विदेशी विज्ञापन देखाउन पाउने छैनन् । बैठकपछि सञ्चार मन्त्री राईले स्वदेशी टेलिभिजन र विज्ञापन एजेन्सीहरुलाई प्रोत्साहन गर्न नीति लागू गरिएको बताउनुभयो ।
एड्भर्टाइजिङ एशोसिएशन अफ नेपाल ( आन )ले क्लिन फिड नीति लागू गर्न माग गर्दै आएको थियो ।
