काठमाडौं, साउन ७ ।
नेपाल कम्युनिस्ट पार्टीका संस्थापक नेता पुष्पलाल श्रेष्ठको ३८ औं स्मृति दिवस आज देशभर विभिन्न कार्यक्रम गरी मनाईंदै छ । दिवसका अवसरमा आज एमाले सहित उसका भातृ संगठन र शुभेच्छुक संघ संस्थाले आज विषेश कार्यक्रमको आयोजना गरेको छ ।
काठमाडौको किर्तिपूर चम्पादेवी स्थित पुष्पलालको सालिकमा प्रधानमन्त्री केपी ओलीसहित एमालेका शिर्ष नेताहरुले माल्यार्पण गर्ने कार्यक्रम छ । यस्तै आज दिउँसो राजधानीको कमलादीस्थित प्रज्ञा भवनमा पुष्पलाल पूर्णङ्की नाटक मन्चन हुदैछ ।
उहाँको जन्म वि.सं. १९८१ असार १५ गते रामेछापको भँगेरीमा भएको हो । नेपाली क्रान्तिका सिद्धान्तकारका रुपमा परिचित पुष्पलालले २००६ साल वैशाख १० गते नेपाल कम्युनिष्ट पार्टीको स्थापना गर्नुभएको हो । उहाँले आफ्नो जीवनभर जनताको स्वतन्त्रताका लागि संघर्ष गर्नुभएको थियो ।
उहाँले विश्व कम्युनिस्ट घोषणापत्रलाई २००५ सालमा नेपालीमा अनुवाद गरी कम्युनिस्ट सिद्धान्तलाई नेपाली मार्क्सवादी विश्लेषकको पहिचान दिनु भएको थियो ।
निरंकुशताको अन्त्यका लागि संयुक्त जनआन्दोलनको कार्य्दिशा २०२५ सालमा अगाडि सार्ने उहाँ पहिलो नेता हुनुहुन्थ्यो । पुष्पलालको २०३५ साल साउन ७ गते आजैका दिन निधन भएको थियो ।
