काठमाडौ ४ साउन ।
बेलायत भ्रमणमा रहेको नेपाली क्रिकेट टोलीले आफ्नो अन्तिम अभ्यास खेलमा आज विश्वकै पुरानो क्लब मेरिलिबोनसँग प्रतिस्पर्धा गर्दैछ ।
यसअघिका चार खेलमा लगातार जीत हात पारेको नेपाली टोलीले आज लर्ड्स मैदानमा विश्वकै पुरानो मेरिलिबोन क्रिकेट क्लब एम.सि.सी.सँग खेल्न लागेको हो ।
नेपाल र बेलायतबिच मित्रवत सम्बन्ध स्थापना भएको दुई सय वर्ष पुगेको अवसरमा हुन लागेको खेल नेपाली समय अनुसार आज दिउँसो सवा तीन बजे हुनेछ ।
नेपाली टोलीले क्रिकेटको मक्का मानिने लर्ड्स मैदानमा पहिलो पटक खेल्न लागेको हो । यसअघि चार स्थानीय क्लबसँग भएको खेलमा सबैमा जीत हात पारेको नेपाली टोली आज लर्ड्स मैदानमा उच्च मनोबलका साथ उत्रनेछ ।
नेपाली टोलीले आइतबार राति भएको एक दिवसीय खेलमा इस्टबर्नलाई एक सय ८१ रन तथा शनिबार राति भएको खेलमा कन्फ्रेन्स क्रिकेट क्लबलाई चार विकेटले हराएको थियो ।
यस्तै बिहीबार भएको ट्वेन्टी–ट्वेन्टी खेलमा इन्डियन जिमखानालाई २० रनले हराएको नेपाली टोलीले बुधबार भएको ४० ओभरको खेलमा फ्रि फोरेस्टरलाई एक सय २९ रनले हराएको थियो ।
नेपाली टोली नेदरल्याण्डसँगको विश्व क्रिकेट लिग च्याम्पियनसिपको तयारीका लागि बेलायत गएको हो ।
