काठमाडौ २८ असार ।
युरोपियन फुटबलको प्रशासकीय निकाय युइएफएले युरोकप २०१६ को आधिकारिक टिम अफ द टुर्नामेन्ट घोषणा गरेको छ ।
टिममा च्याम्पियन पोर्चुगलका कप्तान क्रिष्टियानो रोनाल्डोसहित चार खेलाडी परेका छन् । यस्तै जर्मनीका तीनका साथै फ्रान्स र वेल्सका दुई खेलाडी पनि टीममा परेका छन् ।
युइएफएका प्रमुख प्राविधिक अधिकृत लोएन लुपेस्कुको नेतृत्वमा रहेको १३ सदस्यीय अनुगमन कमिटिले टिमका लागि खेलाडी चयन गरेको हो ।
टिम अफ द टुर्नामेन्टमा पोर्चुगलका कप्तान क्रिष्टियानो रोनाल्डोसहित रुइ पाट्रिसियो, राफेइल गेरिरो, र पेपे परेका छन् । यस्तै जर्मनीबाट जोशुए किमिच, जेरोम बोटेङ र टोनी क्रोस रहेका छन् ।
यसैगरी फ्रान्सका एन्टोनी ग्रिजम्यान, दिमित्री पेयट तथा वेल्सका जो एलन र आरोन रामसी पनि टीममा समेटिएका छन् । रोनाल्डो र पेपे योसँगै तीन पटक युरोकपको टिम अफ द टुर्नामेन्टमा परेका हुन् ।
रोनाल्डो यसअघि सन् २००४ र २०१२ को युरोकपमा टिम अफ द टुर्नामेन्टमा परेका थिए । यस्तै पेपे सन् २००८ र २०१२ को टिममा परेका थिए ।
प्रतियोगिता सुरु हुनु पूर्व नै तयार भएको मापदण्ड अनुसार सर एलेक्स फरग्युसन समेत रहेको टोलीले टिम छनौट गरेको हो । टिममा वेल्सका ग्यारेथ बेल भने परेनन् ।
