काठमान्डौ,२७ असार ।
माओवादी केन्द्रले राष्ट्रिय सहमतिको राजनीति र सहमतिको सरकारका बिषयमा एमाले नेतृत्वसँग फेरि छलफल गर्ने निर्णय गरेको छ ।
एमाले सँग भएको भनिएको ९ बुँदे लिखित र अलिखित ’भद्र सहमति’ कार्यान्वयनका लागि प्रधामन्त्री एंव एमाले अध्यक्ष केपी शर्मा ओलीसँग फेरि छलफल गर्ने निष्कर्षमा पुगेको हो ।
लाजिम्पाटस्थित अध्यक्ष दाहालको निवासमा बसेको माओवादी केन्द्रको बिहान करिब ५ घण्टा चलेको केन्द्रीय कार्यालयको बैठकले छलफलको जिम्मेवारी फेरी पनि अध्यक्ष पुष्पकमल दाहाल प्रचण्डलाई नै दिईएको छ ।
यस अघि पटक पटक सहमति कार्यन्वयन नभएको भन्दै सरकार छाड्ने चेतावनी दिदै आएको माओवादी कुनै विकल्प बारे चर्चा गरे निर्णयमा पुग्न सकेको छैन ।
यही सरकारमा रहने या बाहिरिने भन्नेमा माओवादी नेताहरुबीच मत बाझिएपछि छिनोफानो गर्ने जिम्मा अध्यक्षलाई दिइएको पार्टी प्रवक्ता पम्फा भुसालले जानकारी दिनुभयो । पार्टीबाट मन्त्री बनेकाहरुले सहमतीय सरकारमा जाने भए पहिले स्पष्ट खाका तयार गर्नुपर्नेमा जोड दिएपछि बैठकले सत्ता परिवर्तनबारे ठोस निर्णय गर्न नसकेको हो ।
यसअघि नै सहमतिय सरकार निर्माणको निर्णय गरिसकेको र त्यसमा विशेष जोड दिइरहेको माओवादीले त्यस विषयमा पनि अन्य दलका नेताहरुसँग पनि छलफल गर्ने जनाएको छ ।
बैठकमा सरकार परिवर्तनका विषयमा एमालेस‘ग थप छलफल गर्ने निर्णय भएको प्रवक्ता भुसालले जानकारी दिनुभयो । विगतमा भएका सहमति एवम् समझदारीलाई पूर्णरुपमा कार्यान्वयन गर्नुपर्ने, शान्ति प्रक्रियाका बाँकी काम पूरा गर्नुपर्ने र पूर्व सहमतिलाई अक्षरशस् कार्यान्वयन गराउने विषयमा एमालेसँग छलफल गर्ने निर्णय गरेको उहाँले बताउनुभयो ।
