काठमाडौ २५ असार । चीनको स्वाशासित क्षेत्र तिब्बतका उपाध्यक्ष लिउ जियाङ आज काठमाडौ आउदै हुनुहुन्छ । तिब्बतका सेक्युरिटी डिपार्टमेन्ट प्रमुख समेत रहनु भएका लिउ नेतृत्वको सुरक्षा अधिकारीसहितको टोली तीन दिने भ्रमणका लागि नेपाल आउन लागेको हो ।
नेपाल बसाईका क्रममा उहाँले नेपाल प्रहरी, राष्ट्रिय अुनसन्धान विभाग र शसस्त्र प्रहरीका प्रमुखका साथै गृहसचिव नारायणगोपाल मलेगोसँग भेट गर्ने कार्यक्रम रहेको परराष्ट्रमन्त्रालयले जनाएको छ ।
उहाँले नेपाल–चीन सीमा हुदै आएको तिब्बतीको गैरकानुनी प्रवेश, मुलुकले तिब्बतका पृथकतावादी नेता दलाई लामाका समर्थकलाई गरिरहेको भौतिक तथा राजनितिक सहयोग लगायतका विषयमा छलफल गर्नुहुने कुटनितिक स्रोतले जनाएको छ ।
लिउसहितको चिनियाँ प्रतिनिधि मण्डल र नेपाली पक्षबीच सशस्त्र प्रहरीको एकेडेमी निर्माण र सीमा अपराध नियन्त्रण लगायतका विषयमा पनि छलफल हुने गृहमन्त्रालयका प्रवत्ता यादव कोइरालाले जानकारी दिनुभयो ।
