काठमाण्डौ ,२४ असार ।
बंगलादेशसँग हुने अन्तराष्ट्रिय मैत्रीपूर्ण फुटबलका लागी अनील गुरुङको कप्तानीमा नेपाली टोलीको घोषणा भएको छ ।
असार अन्तिम र साउनको पहिलो हप्ता हुने दुई मैत्रीपूर्ण खेलका लागि २१ सदस्यीय नेपाली टोलीको घोषणा गरिएको एन्फाले जनाएको छ ।
नेपाली राष्ट्रिय टोलीका मूख्य प्रशिक्षक ग्यातुकी कोजीले प्रशिक्षणमा रहेका २९ खेलाडीमध्येबाट २१ जनाको अन्तिम छनौट गरी टोलीको घोषणा गरेका हुन् ।
एन्फाका अनुसार नेपाली टोलीको गोलकिपरमा किरण लिम्बु, बिकेश कुथु र बिशाल श्रेष्ठ छन् । डिफेन्समा उपकप्तान बिराज महर्जन, अनन्त तामाङ, दिनेश राजबंशी, आदित्य चौधरी, जीतेन्द्र कार्की, देभेन्द्र तामाङ, रविन श्रेष्ठ, रञ्जित धिमाल र मानबहादुर तामाङ छन् भने मिडफिल्ड सुजल श्रेष्ठ, बिशाल राई, राजेन्द्र रावल, अञ्जन विष्ट र सुमन लामाले सम्हाल्ने छन्।
त्यस्तै अग्रपंक्ति नवयुग श्रेष्ठ, भरत खवास, रञ्जन विष्ट र कप्तान अनिल गुरुङले सम्हाल्ने छन्। टोलीको प्रशिक्षकमा राजुकाजी शाक्य र गोलकिपर प्रशिक्षकमा उज्वल मानन्धर छन्।
नेपाली राष्ट्रिय टोलीले आगामी असार ३१ र साउन २ मा बंगलादेशसँग दुई मैत्रीपूर्ण खेल खेल्ने छ।
