काठमाडौं, २२ असार ।
ईद पर्वको अवसरमा भोली विहीबारका दिन सरकारले सार्वजनिक विदा दिएको छ । गृह मन्त्रालयले आज बिज्ञप्ती जारी गर्दै विहीबारलाई सार्वजनिक विदाको घोषणा गरेको हो ।
इस्लाम धर्मावलम्बीको महान चाड इद उल फित्र भोली मात्र मनाइने भएको छ । हिजो बेलुका चन्द्रमा नदेखिएकाले इद भोली मनाउन लागिएको हो ।
मुस्लिम धर्मावलम्बीहरुले रमजानको १ महिना लामो कठोर व्रतपछि अन्तिम दिन ईद उल फितर पर्व मनाउने गर्दछन् । चन्द्रमाको आकारको आधारमा यो पर्व मनाउने दिन निर्धारण गर्ने गरिन्छ ।
जब अर्धचन्द्राकार चन्द्रमा आकाशमा देखिन्छ तबमात्र रमजान महिनाको व्रत अन्त्य भई इदउल फितर पर्व सुरु भएको मानिन्छ ।
आज बिहान इद मनाउने तयारी गरेपनि हिजो बेलुका चन्द्रमा नदेखे पछि भोली मात्रै इद मनाउने निर्णय भएको अन्तर धार्मिक परिषद्का संस्थापक एवम् ईस्लामिक संघ नेपालका पूर्व अध्यक्ष मौलाना नजरुल हसन फलाहिले जानकारी दिनुभयो ।
