१९ असार, दोलखा ।
संस्कृति, पर्यटन तथा नागरिक उड्डयनमन्त्री आनन्दप्रसाद पोखरेलले कृषि र होटेल क्षेत्रमा लगानी गर्न आह्वान गर्नुभएको छ ।
सदरमुकाम चरीकोटमा आज आयोजित कार्यक्रममा बोल्दै मन्त्री पोखरेलले जलविद्युत्मा लगानी गर्दा ढिलो मुनाफा आउने भएकाले छिटो नाफा लिन व्यावसायिक कृषिमा लगानी गर्नुपर्ने बताउनु भयो ।
जलविद्युत्मा लगानी गर्न गरिब जनताले नसक्ने भएकाले कृषि पर्यटनतर्फ अघि बढ्नुपर्ने उहाको भनाई थियो ।
मन्त्री पोखरेलले जलविद्युतबाट ४ देखि ६ वर्ष सम्ममा पनि मुनाफा नआउने हुँदा त्यो अवधिसम्म कुर्न कृषकलाई समस्या हुने भएकाले पनि तामाकोसी आयोजनाको सेयर तत्काल नखोलिएको स्पष्ट पार्नुभयो ।
कार्यक्रममा नेकपा (एमाले)का पोलिटब्युरो सदस्य एवम् सांसद पशुपति चौलागाईंले विद्युत्मा लगानी गर्न आउने लगानीकर्ता नाफा कमाउनका लागि आउने भएकाले उनीहरुलाई सहमति दिँदा धेरै विषयमा सोचेर दिन आवश्यक रहेको बताउनु भयो ।
एमालेका केन्द्रीय सदस्य एवम् सांसद पार्वत गुरुङले विद्युत्मा लगानी गर्ने लगानीकर्ताको कारण दोलखाको जलविद्युत् आयोजना धराशायी बनेको धारणा राख्नुभयो ।
