काठमाडौ १९ असार ।
इटालीलाई पराजित गर्दै विश्व विजेता जर्मनी युरोकप फुटबलको सेमिफाइनलमा प्रवेश गरेको छ । गएराति सम्पन्न तेस्रो कवाटरफाइनल खेलमा इटालीलाई टाइब्रेकरमा ६–५ ले पराजित गर्दै जर्मनीले अन्तिम चारमा स्थान बनाएको हो ।
निर्धारित समयमा दुवै टोली एक एकको बराबरीमा रोकिएपछि थपिएको समयमा पनि दुवै तर्फबाट गोल हुन सकेन । त्यसपछि खेलको निर्णय टाइब्रेकरबाट लिइएको हो । जर्मनीले कुनै पनि मुख्य प्रतिस्पर्धामा इटालीलाई हराएको यो पहिलो पटक हो ।
पहिलो टाइब्रेकरमा पनि दुवै तर्फबाट दुई दुई गोलमात्र भएपछि खेल निर्णयबिहिन बनेको थियो । टाइब्रेकरमा जर्मनीका थोमस मुलर, ओजिल र स्वाइन्स गोल गर्नबाट चुके । यस्तै इटलीका जाजा, पेले र बोनुचीले पनि गोल गर्न सकेनन् ।
त्यसपछि सडन डेथमा इटलीका डर्मिअन गोल गर्नबाट चुकेपछि अन्ततः विश्व विजेता जर्मनी विजयी भयो । जर्मनीका लागि सडन डेथमा हृयामल्स, किमिच, बोटेङ र जोनस हेक्टरले गोल गरे भने इटलीका गिआचेरिनी, पारोला र डि सिलिओले गोल गरेका थिए ।
यसअघि खेलको ९० मिनेटभित्र इटालीलाई केही दबाबमा राखेको जर्मनीले ६५ औं मिनेटमा ओजिलको गोलबाट अग्रता लिएपनि ७८ औं मिनेटमा इटलीले पेनाल्टीमार्फत गोल फर्काएपछि खेल बराबरीमा पुगेको थियो ।
जर्मनीले आयोजक फ्रान्स र आइसल्याण्डको विजेतासँग सेमिफाइनल खेल्नेछ । फ्रान्स र आइसल्याण्डबीचको अन्तिम क्वाटर फाइनल खेल आज राति पौने एक बजे हुनेछ ।
