काठमाडौं ,१७ असार।
नेपाली कांग्रेसका सभापति शेरबहादुर देउवाले बाढी पहिरोमा परेर दुःख पाएकाहरुको उद्धार र राहत कार्यमा सहयोग गर्न पार्टीका सबै निकायहरुलाई निर्देशन दिनु भएको छ ।
उहाले आज एक प्रेस विज्ञप्ति निकाल्दै पीडित परिवारहरुको उद्धार र राहतका लागि पार्टीका भातृ एवं शुभेच्छुक संघ संस्थाहरुलाई सहयोग गर्न निर्देशन दिनु भएको हो । कांग्रेसले बाढी पहिरोमा परेकाहरुप्रति दुःख व्यक्त पनि गर्नु भएको छ ।
प्राकृतिक विपत्तिको धैर्यताका साथ सामना गर्न र विपतमा परेका पीडित परिवारलाई तत्काल उद्धार, राहत र सहयोग गर्न पनि कांग्रेसले सरकारसँग माग गरेको छ ।
‘केही दिनदेखि परेको अविरल वर्षका कारण पहिरो र बाढीबाट धादिङ, गोरखा, दोलखा लगायत देशका विभिन्न भागहरुमा कतिपय व्यक्तिहरु हराइरहेका, दुई तर्फको पहिरोको बीचमा थुनिएका, सयौंको संख्यामा घाइते भएका र धनसम्पत्तिको अपूरणीय क्षति भएको घटनाप्रति नेपाली कांग्रेस गहिरो दुःख व्यक्त गर्दछ,’ मुख्य सचिव कृष्णप्रसाद पौडेलद्वारा जारी विज्ञप्तिमा भनिएको छ ।
