काठमाण्डौ, १५ असार।
नेपाल र जापानका उच्च अधिकारी सम्मिलित नेपाल–जापान राजनीतिक परामर्श संयन्त्रको बैठक आज काठमाडौंमा हुने भएको छ ।
बैठकमा पारस्परिक सम्बन्धका विविध पक्षबारे दुबै मुलुकका अधिकारीले विचार आदान–प्रदान गर्नुका साथै नेपाल–जापान कूटनीतिक सम्बन्ध स्थापनाको ६०औं वार्षिकोत्सवका बारेमा पनि छलफल हुनेछ ।
यस्तै बैठकमा नेपालको विकासमा जापानी सहयोग, भूकम्पपछिको पुनःनिर्माणमा जापानी मद्दत एवं क्षेत्रीय र विश्वव्यापी चासोका विषयमा विचार–विमर्श हुने परराष्ट्र मन्त्रालयका सहसचिव झवीन्द्रप्रसाद अर्यालले बताउनुभयो ।
बैठकमा नेपालका लागि जापानका राजदूत मासासी ओगावासहित काठमाडौंस्थित जापानी राजदूतावासका उच्च अधिकारीहरु ९ जना सहभागी हुनेछन् ।
त्यसैगरी, बैठकमा नेपालका तर्फबाट परराष्ट्र, शिक्षा, स्वास्थ्य, अर्थ, गृह, लगायतका अन्य बिभिन्न मन्त्रालयका गरी १५ जना सहभागी हुने छन् ।
