काठमाण्डौ, १३ असार ।
नक्कली शैक्षिक प्रमाणपत्रको आरोपमा पक्राउ परेका डाक्टरहरुले दायर गरेको बन्दी प्रत्यक्षीकरणको रिट सर्वोच्च अदालतले खारेज गरिदिएको छ ।
त्यसैगरी काठमाडौं जिल्ला अदालतले पक्राउ परेका डाक्टरहरुलाई पााच दिन हिरासतमा राखेर अनुसन्धान गर्न अनुमति दिएको छ ।
नेपाल प्रहरीको केन्द्रीय अनुसन्धान ब्युरो (सिआइबी)को अपरेशन क्वाकमा पक्राउ परेका १० जना नक्कली प्रमापत्रधारी डाक्टरहरुले आफूहरुलाई गैरकानुनीरुपमा थुनामा राखेको भन्दै सर्वोच्चमा रिट दायर गरेका थिए ।
यही असार ७ गते परेको रिट आज कायममुकायम प्रधानन्यायाधीश सुशीला कार्की र न्यायाधीश गोविन्द उपाध्यायको संयुक्त इजलासले खारेज गरिदिएको हो ।
डाक्टरहरु रामकुमार प्रधान, विनिता पाण्डे, सरोज घिमिरे, पन्नलाल पटेल, मोहम्द रुहुल्लाह, श्रीराम घिमिरे लगाएत १० जनाले सर्बोच्चमा रिट हालेका थिए ।
प्रहरीले आफनो कार्यक्षेत्रभन्दा बाहिर गएर आफूहरुलाई थुनामा राखेको भन्दै परेकोे मुद्दा खारेज भएसँगै सिआइबीलाई डाक्टरहरुमाथि अनुसन्धान गर्ने बाटो खुलेको डिआइजी नवराज सिलवालले बताउनुभयो ।
गत पाँच गते सिआइबीले दश जिल्लाका विभिन्न अस्पतालहरुमा एक साथ अपे्रशन गरेर नक्कली शैक्षिक प्रमाणपत्रको आरोपमा ३६ जना डाक्टरहरुलाई पक्राउ गरेको थियो ।
