काठमाडौं , ८ असार ।
काठमाडौंको बागबजारस्थित पुरानो बसपार्क नजिकै सडकमा हिडिरहेकी दोलखाकी सुष्मा थामीमाथि छुरा प्रहार भएको छ ।
बागबजार नै बस्दै आएकी दोलखा लापिङकी २१ वर्षीया सुष्मा माथि बिहान करिब ८ बजे हिंडिरहेको अवस्थामा छुरा प्रहार भएको हो ।
महानगरीय प्रहरी वृत्त सिंहदरवारका अनुसार आफूलाई सुष्माको श्रीमान बताउने दोलखा लापिङकै २१ वर्षीय झलकबहादुर थापाले छुरा प्रहार गरेका हुन् ।
पछाडिबाट प्रहार गरिएको छुराले सुष्माको ढाडमा गहिरो चोट लागेको छ । उनी अहिले बोल्न नसक्ने अवस्थामा रहेको प्रहरी बताएको छ । उनको बागबजारस्थित मोडल अस्पतालमा उपचार भैरहेको छ ।
छुरा प्रहार गर्ने थापालाई प्रहरीले पक्राउ गरिसकेको प्रहरीले जनाएको छ । सुष्मासँग करिब २ वर्ष अगाडि आफ्नो विवाह भएको र घरायसी विवादका कारण केही महिनादेखि आफूहरु छुट्टाछुटै बस्दै आएको थापाले प्रहरीलाई बयान दिएका छन् ।
