काठमाडौ ६ असार ।
फ्रान्समा जारी युरोकप फुटबल प्रतियोगिता अन्तरगत आज राति दुई खेल हुदैछन् । समुह बी अन्तरगत अन्तिम खेलमा आज रसिया र वेल्स तथा स्लोभाकिया र इंग्ल्याण्डबीच प्रतिस्पर्धा हुनेछ ।
दुवै खेल नेपाली समय अनुसार राति पौने एक बजे सुरु हुनेछ । एक बराबरी र एक जीतका साथ समुहको शीर्ष स्थानमा रहेको इंग्ल्याण्ड अघिल्लो चरण नजिक छ ।
स्लोभाकिया विरुद्धको खेलमा बराबरी मात्र गरेपनि इग्ल्याण्ड प्रतियोगिताको अन्तिम १६ मा पुग्नेछ । तीन अंक जोडेको स्लोभाकियालाई भने अन्तिम १६ मा पुग्न आजको खेल जित्नैपर्ने दवाव छ ।
यस्तै समुह बी मै रहेको अर्को टोली रसिया पनि दवावमा रहेको छ । अन्तिम १६ मा स्थान पक्का गर्न उसले आज वेल्सलाई पराजित गर्नै पर्ने हुन्छ ।
तर प्रतियोगितामा उत्कृष्ट प्रदर्शन गरिरहेको वेल्सलाई पराजित गर्नु रसियाका लागि त्यति सहज भने देखिदैन । सहज अवस्थामा रहेको वेल्सले आज बराबरी मात्रै गरेपनि अन्तिम १६ मा ठाउ बनाउनेछ ।
प्रतियोगिता अन्तरगत गएराति सम्पन्न खेलमा अल्बानियाले रोनामानियालाई १–० ले पराजित गर्दै अन्तिम १६ मा पुग्ने सम्भावना कायम राखेको छ ।
लियोनमा भएको खेलमा अल्बानियाका लागि अर्मान्डो साडिकुले खेलको ४३ औं मिनेटमा गरेको गोल नै निर्णायक बन्यो ।
जीतसँगै युरोकपमा पहिलो जित दर्ता गरेको अल्बानियाले उत्कृष्ट तेस्रोमा पर्ने चार टिम अन्तर्गत परेर अन्तिम १६ मा पुग्ने सम्भावना कायम राखेको छ । समूह ए बाट फ्रान्स विजेता तथा स्वीट्जरल्याण्ड उविजेता बन्दै अन्तिम १६ मा पुगिसकेका छन् ।
समुह ए अन्तरगत नै गएराति सम्पन्न अर्को खेलमा फ्रान्सलाई गोलरहित बराबरीमा रोकेको स्वीट्जरल्याण्ड समूह ए को उपविजेता बन्दै अन्तिम १६ मा प्रवेश गरेको हो । अघिल्ला दुई खेल जितेको फ्रान्स भने समूह विजेता बनेको छ ।
समूहका तीन खेल सकिँदा फ्रान्सको सात तथा स्वीट्जरल्याण्डको पाँच अंक भएको छ । फ्रान्सले अब समूह सी, डी वा इ को तेस्रो स्थानमा रहेको टिमसँग खेल्ने छ । यस्तै स्वीट्जरल्याण्डले समूह सीको दोस्रो स्थानको टिमसँग खेल्ने छ ।
