काठमाडौ ३ असार ।
कैलाश मानासरोवर तीर्थयात्राबाट फर्केका भारतीय तीर्थयात्रीले रनवेमा अवरोध पुर्याउँदा सुर्खेत विमानस्थल आज साढे दुई घण्टा ठप्प भएको छ ।
हुम्लाबाट नेपालगञ्ज विमानस्थलको बोडिङ पास दिएर सुर्खेतमा झारिएको भन्दै मानासरोवरबाट फर्किएका भारतीय तीर्थालुले रनवेमै सुतेर अवरोध गरेपछि हुम्ला जाने र त्यहाँबाट आउने छ वटा उडान प्रभावित भएको हो ।
रनवेको अवरोध हटाउन प्रहरीले बल प्रयोग गर्नु परेको थियो । सो क्रममा एक महिला प्रहरीसहित दुई तीर्थालु घाइते भएको बताइएको छ ।
आज विहान हुम्लाको सिमीकोटबाट नेपालगञ्जका लागि भारतीय तीर्थयात्रु बोकेर उडेको गोमा एयरका दुई जहाज सुर्खेतमै रोकिएपछि विवाद सुरु भएको थियो ।
भारतीय तीर्थयात्रुका अनुसार गोमा एयरले सिमीकोट विमानस्थलमा नेपालगञ्जसम्म पुर्याउने भन्दै बोडिङ पास दिएको थियो । तर नेपालगञ्जको सट्टा सुर्खेतमा ल्याएर छोडेको भन्दै आफूहरु आन्दोलित भएको उनीहरुको भनाई छ ।
नागरिक उड्डयन प्राधिकरण सुर्खेत शाखाका निमित्त निर्देशक छवीसिंह ठकुल्लाले एजेण्ट र एयरलाइन्सको कमजोरीले विमानस्थल अवरुद्ध हुन पुगेको बताउनु भयो ।
तीर्थयात्रुहरु रनवेमै सुतेर उडान अवरुद्ध भएपछि बल प्रयोग गर्नु परेको ठकुल्लाले बताउनु भयो । अवरोधका कारण नेपालगञ्जबाट सुर्खेत हुँदै मानासरोवर हिँडेका ६५ जना तीर्थयात्री समेत अलपत्र परेका छन् ।
