काठमाडौं, असार ३।
पेशागत महासंघको छैटौं राष्ट्रिय महाधिवेशन आज देखि राजधानीमा सुरु हुदै छ ।
स्वाधिन अर्थतन्त्र समृद्धि जीवनका लागि गुणास्तर सेवा र जिम्मेवारी ट्रेड युनियन भन्ने मुल नाराका साथ महाधिवेशन सुरु हुन लागेको हो ।
तीन दिनसम्म चल्ने उक्त महाधिवेशनको मध्यान्ह १२ बजे प्रधानमन्त्री केपी शर्मा ओलीले उद्घाटन गर्ने कार्यक्रम रहेको महासंघले जनाएको छ ।
राजधानीको प्रज्ञा प्रतिष्ठानमा हुने महाधिवेशनले नयाँ नेतृत्व चयन गर्ने छ । महाधिवेशनको उद्घाटन अघि भृकृटि मण्डपबाट र्याली निकाल्ने तयारी भएकोे महासंघका महासचिव शिव कुमार अधिकारीले जानकारी दिनु भयो ।
महाधिवेशन व्यवस्थित बनाउन महासंघका अध्यक्ष विश्वनाथ प्याकुरेलको संयोजकत्वमा ९१ सदस्यीय व्यवस्थापन समिति र विभिन्न १४ ओटा उपसमितिहरु गठन गरिएको छ ।
महाधिवेशनमा महासंघमा आवद्ध २५ राष्ट्रिय घटकहरु, ४७ ओटा प्रतिष्ठान स्तरका ट्रेड युनियन र महासंघका ७५ जिल्लाबाट आठ सयभन्दा बढी प्रतिनिधि एवं पर्यवेक्षकहरुले भाग लिने बताइएको छ ।
