काठमाण्डौ, १ असार ।
राष्ट्रिय मानव अधिकार आयोगले संचार सेवा प्रदायक संस्था एनसेल टावरहरुमा आगजनी र तोडफोड गर्नेलाई कानुनको दायरामा ल्याउन सरकारलाई आग्रह गरेको छ । आयोगले पीडित पक्षलाई क्षतिपूर्ति प्रदान गर्न पनि भनेको छ ।
आयोगकी प्रवक्ता मोहना अन्सारीले आज विज्ञप्ति निकालेर एनसेल टावरहरुमा भएको आगजनी तथा तोडफोडको घटनाप्रति राष्ट्रिय मानव अधिकार आयोगको गम्भीर ध्यानाकर्षण भएको जनाउनुभएको छ ।
विज्ञप्तिमा भनिएको छ, ‘घटनाको प्रभावकारी अनुसन्धान गरी दोषीलाई कानूनको दायरामा ल्याउन तथा पीडित पक्षलाई उचित क्षतिपूर्ति प्रदान गर्न आयोग नेपाल सरकारलाई आग्रह गर्दछ ।’
यसैगरी आयोगले गत जेठ ७ गते ललितपुरको होगल इलाछे मंगलबजारस्थित एक पसलमा ग्यास सिलिण्डर पड्केर तीन जना व्यक्तिको मृत्यु भएको घटनाप्रति दुःख व्यक्त गरको छ ।
घटनाको अनुसन्धान गरी दोषीलाई कारबाही र पीडित परिवारलाई क्षतिपूर्ति प्रदान गर्न पनि आयोगले सरकारको ध्यानाकर्षण गराएको छ ।
आयोगले आजै उक्त घटनाको सम्बन्धमा स्थानीय प्रशासन तथा नेपाल गुणस्तर तथा नापतौल विभागमा पत्राचार समेत गरेको छ ।
