एजेन्सी असार १ ।
कोपा अमेरिकी फुटबल प्रतियोतिा अन्तरगत आज विहान भएको खेलमा डिफेन्डिङ च्याम्पियन चिली विजयी भएको छ । यस सँगै चिली प्रतियोगितामा क्वाटर फाइनलमा प्रवेश गरेको छ ।
प्रतियोगितामा चिलीले पानामालाई ४–२ को गोल अन्तरले पराजित गर्दै क्वाटर फाइनलमा प्रवेश गरेको हो ।
फिलाडेल्फियामा भएको खेलमा पानामाले खेलको पाँचौ मिनेटमा मिग्युइल कामारगोले गोल गर्दै सुरुवाती अग्रता लिए पनि जीत सुनिश्चित गर्न भने सकेन ।
चिलीका लागि खेलको १५ औ मिनेटमा भारगासले गोल गर्दै टोलीलाई १–१को बराबरीमा ल्याएका थिए । खेलको ४३ औ मिनेटमा व्यक्तिगत दोस्रो गोल गर्दै टोलीलाई २–१ ले अगाडि बढाए ।
त्यस्तै खेलको ५० औ मिनेटमा चिलीका अर्का खेलाडि सान्चेजले एक गोल गर्दै टोली लाई ३–१ले अग्रता दिलाए । खेलको ७५ औ मिनेटमा पानमाका खेलाडि अब्डेलले एक गोल गर्दै चिलीको अग्रतालाई ३–२ मा झारे ।
खेलको ८९ औ मिनेटमा सान्चेजले व्यक्तिगत दोस्रो गोल गर्दै टोलीलाई४ –२ ले विजयी गराए । यस सँगै चिली प्रतियोगिताको क्वाटरफाइनलमा प्रवेश गरेको छ ।
