काठमान्डौ, जेष्ठ ३० ।
असार १ गतेदेखि उत्तरतर्फको कोरला नाका २५ दिनका लागि खुल्ने भएको छ । नेपाल र चीनबीच भएको सहमति अनुसार सो नाका खुल्ने भएको हो ।सो नाकामा असार १ गतेदेखि व्यापार मेला हुँदैछ । मेलामा नेपाल र चीन दुवैतर्फका व्यापारीहरु आउनेछन् ।
चीनले नेपालसँग नाकाबाट दीर्घकालिन व्यापार गर्न मेलालाई प्रयोगात्मकरुपमा लिएको छ । चीनतर्फको ढुंवासेन बजार पुगेर व्यापार गर्न आउने नेपाली नागरिकले भिषा लिनुपर्ने छैन भने ढुंवासेन बजार भन्दा उता नेपालीलाई जान निषेध गरेको छ ।
नाका खुल्ने भएपछि नेपाली सुरक्षा अधिकारीहरु सीमातर्फ जान थालेका छन् । सिमानामा सम्पूर्ण सुरक्षा व्यवस्था मिलाइएको प्रमुख जिल्ला अधिकारी गणेश अधिकारीले जानकारी दिए ।
हिउँ नपर्ने मौसम भएकाले अहिले नाका खुलाउन लागिएको हो । नेपालीले सामान किन्नका लागि कोरला मूल गेटको सिमानाबाट २ किमी चीनतर्फको स्थानमा जानुपर्नेछ ।
चीनतर्फका ब्यापारीले नेपालीलाई किनमेलका लागि पायक हुने गरी सिमानानजिकै सामान ल्याएर राखेका छन् । चीनविरुद्ध गतिविधि बढेको भन्दै १० वष अघि चीनले यो सीमा क्षेत्रमा तारबार गरेको थियो ।
