चितवन, जेठ ३० ।
नारायणगढ–मुग्लिन सडकखण्डमा ठाउँठाउँमा पहिरो खसेपछि आज बिहानबाट सडक अवरुद्ध बनेको छ । सडक खण्डको जलवीरेदेखि कालीखोला सम्मको भागमा पहिरो खसे पछि बिहान ४ः३० बजेबाट पहिरोका कारण सडक अवरुद्ध बनेको हो ।
जलवीरेदेखि कालीखोलासम्मको पाँच किलोमिटर भागमा सात ठाउँमा पहिरो खसेको सो सडक विस्तार गरिरहेको नारायणगढ–मुग्लिन सडक आयोजनाका इञ्जिनियर शिव खनालले जानकारी दिनु भयो ।
जसमध्ये जलवीरेमा ठूलो पहिरो खसेको खनालले बताए । पहिरोका कारण सडकको दुवैतर्फ गाडीको लाम लागेको छ ।
यस्तै दैनिकजसो जामहुने मुग्लिन नारायणगढ सडकमा संयुक्त सुरक्षा फोर्स परिचालन हुने भएको छ ।
लामो समयदेखि जारी सडक विस्तारका कारण अबरोध र बाढी पहिरोको जोखिम बढेकाले सडमा हुने अवरोध हटाउन सुरक्षा फोर्स परिचालन गर्न लागेको चितवनका प्रहरी प्रमुख तथा प्रहरी उपरीक्षक बसन्तबहादुर कुँवरले बताउनु भयो ।
जनपद प्रहरी र सशस्त्र सीमा सुरक्षा बल आँपटारीको संयुक्त सुरक्षा फोर्स परिचालन गरी अबरोध हटाउने कार्य सुरु हुन लागेको जिल्ला सुरक्षा समिति चितवनले जनाएको छ ।
आगामी २ महिनासम्म सो क्षेत्रमा रहने संयुक्त सुरक्षा फोर्समा जनपद प्रहरीका ११ जना र सशस्त्रका १३ जना प्रहरीहरु खटिने प्रहरी उपरीक्षक कँवरले जानकारी दिनु भयो ।
