काठमाडौं ,२६ जेठ ।
आईसीसीले हालै मात्र पत्र पठाएर नेदरल्याण्ड भ्रमणको तयारी थाल्न निर्देशन दिएपछि नेपाली क्रिकेट टोलीले शुक्रबारबाट नेदरल्याण्डविरुद्धको खेलको तयारी थाल्ने भएको छ ।
विश्व क्रिकेट लिग च्याम्पियनपसीप अन्तर्गत नेपालले साउन अन्तिममा नेदरल्याण्डसँग खेल्दैछ । नेपाल क्रिकेट संघ क्यान निलम्बनमा परेपछि अन्तराष्ट्रिय क्रिकेट काउन्सिल आफैंले नेपाली टोली हेरिरहेको छ ।
आईसीसीले हालै मात्र नेदरल्याण्ड भ्रमणको तयारी थाल्न निर्देशन दिँदै भावना घिमिरेलाई स्थानीय संयोजक तोकेको थियो ।आईसीसीको पत्र आएपछि शुक्रबारबाट बन्द प्रशिक्षण सुरु गर्ने तयारी भइरहेको घिमिरेले बताइन् ।
बन्द प्रशिक्षणमा २४ खेलाडीलाई बोलाइएको छ । वैशाख पहिलो साता काठमाडौंमा नामिबियाविरुद्ध खेल्दा टोलीमा रहेका १४ र चार बैकल्पिक खेलाडी स्वतः बन्द प्रशिक्षणमा परेका छन् ।
नामिबियाविरुद्ध खेल्दा नेपाली टोलीमा पारस खड्का, ज्ञानेन्द्र मल्ल, शदर भेषावकर, बसन्त रेग्मी, सोमपाल कामी, करण केसी, राजेश पुलामी, राजु रिजाल, सुशन भारी र सन्दीप लामिछाने टोलीमा थिए । विक्रम सोव, दिपेन्द्रसिंह ऐरी, प्रेम तामाङ र अनिल मण्डल बैकल्पिकमा थिए ।
अरु ६ जनालाई पनि बन्द प्रशिक्षणमा बोलाइएको नेपाली टोलीका प्रशिक्षक जगत टमाटाले जानकारी दिए ।
तयारीका क्रममा नेपाली टोली जुलाई १२ मा बेलायत जानेछ । १९ तारिखमा एमसीसीविरुद्ध लर्डसमा एक खेल हुनेछ भने बाँकी केही खेल स्थानीय टीमसँग खेल्ने नेपालको तयारी छ ।
