काठमाडौ ,२२ जेठ ।
ल्याटिन अमेरिकाको सबैभन्दा ठूलो फुटबल प्रतियोगिता कोपा अमेरिका फुटबलको ४५औं संस्करण आजबाट सुरु भएको छ ।
प्रतियोगिताको उद्घाटन खेलमा अमेरिकालाई २–० गोल अन्तरले पराजित गर्दै कोलम्बियाले विजयी सुरुवात गरेको छ । कोलम्बियाका लागि जेम्स् रेड्रिग्वयज र जापाटाले एक एक गोल गरे ।
खेलको ८ औं मिनेटमा जापाटाको गोलबाट अग्रता लिएको कोलम्बियाका लागि ४२ औं मिनेटमा कप्तान रोड्रिग्वेजले गोल गर्दै अग्रता दोब्बर पारे ।
त्यसपछि दोस्रो हाफमा दुवै तर्फबाट गोल हुन सकेन र कोलम्बिया २–० ले विजयी भयो । घरेलु दर्शकको साथ पाएको अमेरिकाले भने गोल गर्ने केही राम्रा मौका पाएपनि सदुपयोग गर्न सकेन ।
आगामी असार १२ गतेसम्म सञ्चालन हुने प्रतियोगितामा दक्षिण अमेरिकी फुटबल महासंघ काफमा आबद्ध १० राष्ट्र ब्राजिल, अर्जेन्टिना, कोलम्बिया, पाराग्वे, उरुग्वे, चिली, बोलिभिया, भेनेजुएला, इक्वेडर र पेरु सहभागी छन् ।
यसैगरी, उत्तर अमेरिकी तथा क्यारेबियन राष्ट्रहरुको समूह कोन्का काफका ६ राष्ट्र अमेरिका, मेक्सिको, पानामा, जमैका, कोस्टारिका र हाइटी पनि प्रतियोगितामा सहभागी छन् ।
