काठमाडौ १८ जेठ ।
आज विश्व धुम्रपानरहित दिवस, नेपालमा पनि विभिन्न सचेतनामूलक कार्यक्रम गरी मनाईंदैछ । विश्वमा सुर्ती सेवनलाई निस्तेज पार्ने उदेश्यले हरेक वर्ष मे ३१ तारीखमा यो दिवस मनाउने गरिन्छ ।
दिवसका अवसरमा स्वास्थ्य तथा जनसंख्या मन्त्रालय एवम् स्वास्थ्य क्षेत्रसँग सम्बन्धित विभिन्न संघसंस्थाले आज विविध कार्यक्रमको आयोजना गरेका छन् ।
नेपालमा सुुर्ती र चुरोटका कारण वर्षेनी १५ हजार बढीको मृत्यु हुने गरेको सरकारी तथ्यांक छ । सुर्ती र चुरोटकै कारण वर्षेनी ७ हजारलाई क्षयरोग र २७ हजारलाई क्यान्सर रोग लाग्ने गरेको छ ।
मुलुकमा ५१ प्रतिशत भन्दा बढी मानिसको मृत्यु सुुुर्ती सेवनका कारण लाग्ने रोगबाट हुने गरेको अध्यनले देखाएको छ । चुरोट सुर्ती खानेलाई हृदयघात, मुटुरोग तथा क्यान्सर जस्ता स्वास्थ्य समस्याको खतरा उच्च हुने चिकित्सकहरुले बताएका छन् ।
पछिल्लो समय सरकारले सार्वजनिक ठाउँमा सुर्ती र चुरोट खान नपाइने नियम ल्याए पनि प्रभावकारी रुपमा कार्यान्वयन भने हुन सकेको छैन ।
