काठमाण्डौ ,१७ जेठ । प्रधानमन्त्री केपि शर्मा ओली र नेकपा माओवादी केन्द्रका अध्यक्ष पुष्पकमल दाहालबीच भेटवार्ता भएको छ ।
वालुवाटारस्थित प्रधानमन्त्री निवासमा बिहान भएको भेटमा प्रधानमन्त्री र अध्यक्ष दाहालबीच राजनीतिक परिस्थिति र बजेटका बारेमा छलफल भएको जनाइएको छ ।
अध्यक्ष दाहालले बजेट सकारात्मक भएपनि सहमतिको भावना अनुरुप चल्न प्रधानमन्त्री ओलीको ध्यानाकर्षण गराउनु भएको थियो ।
दाहालले सत्तासाझेदार दलहरुसँग पर्याप्त छलफल नै नगरी एकलौटी रुपमा बजेट आएको गुनासो गर्नुभएको प्रधानमन्त्रीको निजी सचिवालयले जनाएको छ ।
झण्डै एक घण्टा लामो छलफलमा आजबाट सुरु हुने बजेटमाथिको सैद्धान्तिक छलफलमा सत्तारुढ दलहरुको भूमिका सम्बन्धमा समेत छलफल भएको बताईएको छ ।
सरकारले शनिबार संसदमा प्रस्तुत गरेको बजेटमा तामाकोशि जलविद्युत आयोजनामा जनयुद्धका सहिद परिवारलाई १० लाख बराबरको शेयर दिने, किसानलाई पेन्सन लगायतका विषय नसमेटिए पछि माओवादी सरकारसँग असन्तुष्ट भएको हो ।
माओवादी संसदीय दलको बैठकले संसदमा बजेटमा नसमेटिएका विषयमा सशक्त आवाज उठाउने निर्णय गरेको थियो ।
