काठमाण्डौ १६ जेठ । रसुवामा भएको प्रथम लाङटाङ–गोसाईकुण्ड हाफ म्याराथन दौड प्रतियोगितामा नेपाली सेनाका भरत कार्की प्रथम भएका छन् ।
नारायण दल गणका कार्कीले निर्धा्रित २१ किलोमिटरको दूरी एक घण्टा १७ मिनेट ५५ सेकेन्डमा पार गरेका हुन् ।
एक घण्टा १८ मिनेट ३५ सेकेण्डमा दूरी पार गरेका नेपाली सेनाकै होमलाल श्रेष्ठ दोस्रो भएका छन् ।
एक घण्टा १८ मिनेट ४६ सेकेण्डमा दूरी पार गरेका जुम्लाका गोविन्दप्रसाद अधिकारी तेस्रो भएका छन् । यसैगरी महिला तर्फ रसुवाकी फूलमाया स्याङ्वाले दुई घण्टा दुई मिनेट २६ सेकण्डमा दूरी पार गरी प्रथम भएकी छन् ।
दुई घण्टा १३ मिनेट ५३ सेकेण्डमा दूरी पार गरी सिन्धुपाल्चोककी कमला तामाङ दोस्रो तथा २ घण्टा १६ मिनेट १७ सेकेण्डमा दूरी पार गरी रसुवाकी विन्दा विक तेस्रो भएकी छन् ।
भूकम्पका कारण क्षति पुगेको लाङटाङ गाँउमा खुसी ल्याउन सहयोग गरौ भन्ने नाराका साथ ट्रेकिङ एजेन्सिस एशोसिएशन अफ नेपाल (टान) को ३८ औँ स्थापना दिवसको अवसरमा हाफ म्याराथन प्रतियोगित भएको हो ।
प्रतियोगितामा पहिलो हुनेले ५० हजार, दोस्रो हुनेले ३० हजार र तेस्रो हुनेले २० हजार नगदसहित प्रमाणपत्र प्राप्त गर्ने छन् । प्रतियोगितामा एक सय ७ जनाले नाम दर्ता गराएकोमा एक सय एक जना धावकले सहभागिता जनाएका थिए ।
